Mikil uppbygging þjóðarleikvanga fyrirhuguð í Lettlandi

Ef áætlanir ganga eftir mun Lettland eyða á næstu árum rúmum 13 milljörðum íslenskra króna í endurbætur og uppbyggingu nýrra íþróttamannvirkja sem eru og verða skilgreind sem þjóðarleikvangar.

Ljóst er að nýr þjóðarleikvangur fyrir knattspyrnu mun rísa innan fárra ára og leysa af hólmi Skonto Stadions sem var tekinn í notkun árið 2000. Sá völlur þótti aldrei vel heppnaður sem þjóðarleikvangur og er hann m.a. opinn á aðra skammhliðanna þar sem bílastæðaplan er staðsett.

Þá hefur þjóðarleikvangurinn í frjálsum íþróttum, Daugavas Stadions, gengið í gegnum miklar og gagngerar endurbætur sem þýðir að þar geta nú farið fram stór og veigamikil frjálsíþróttamót. Leikvangurinn var í nokkurri niðurníslu en eftir enduruppbygginguna er ljóst að um er að ræða glæsilegan frjálsíþróttaleikvang.

Stjórnvöld í Lettlandi kynntu síðan fyrir stuttu hugmyndir að mikilli uppbyggingu á nærsvæði Daugavas Stadions og er ljóst að þar mun rísa hágæða, alhliða íþróttasvæði. Þarna er þeirra Laugardalur ef svo má segja.

Frjálsíþróttaleikvangur, skautahöll, fjölnota íþróttahöll og frjálsíþróttahöll

Þar er ætlunin að reisa stóra skautahöll sem vonast er til að geti létt á álaginu á Arena Riga sem er þjóðarleikvangur skautaíþrótta í Lettlandi. Þörfin á annarri stórri skautahöll er talin mikil.

Íþróttahreyfingin í Lettlandi hefur auk þess á undanförnum árum kallað eftir því að stór fjölnota íþróttahöll verði reist í Riga sem verði þjóðarleikvangur fyrir innanhúsíþróttir. Riga Arena sem hýsir meðal annars leiki lettneska körfuboltalandsliðsins var í grundvallaratriðum hönnuð með ísknattleik í huga og eru margir þeirrar skoðunar að skautaíþróttir og innanhúsíþróttir fari ekki vel saman.

Með þetta í huga hefur verið ákveðið að reisa þjóðarleikvang fyrir innanhúsíþróttir við hliðina á Daugavas Stadions. Um er að ræða stóra og glæsilega fjölnota íþróttahöll sem mun nýtast hinum ýmsu íþróttagreinum s.s. körfubolta, handbolta, blaki og fimleikum.

Þá mun stór frjálsíþróttahöll rísa á svæðinu sem einnig verður hægt að nýta undir hjólreiðaíþróttir.

Aðrar minni hallir munu einnig byggjast upp við Daugavs Stadions þar sem íþróttagreinar eins og júdó, karate og hnefaleikar munu eiga samastað.

Ísland langt á eftir í þessum málaflokki

Ef við berum þessa þróun í Lettlandi saman við þá þróun sem á sér stað á Íslandi verður að segjast að baltneska þjóðin er komin langt á undan okkur í þessum málum.

Núverandi þjóðarleikvangur ísknattleiks og innanhússíþrótta, Arena Riga, var tekin í notkun árið 2006. Höllin er glæsilegt mannvirki og kostaði bygging þess um 4 milljarða króna á núvirði. Til samanburðar var Laugardalshöll tekin í notkun árið 1965.

Eins og áður sagði er núverandi þjóðarleikvangur Letta í knattspyrnu einungis um 20 ára gamall og nam kostnaðurinn við byggingu hans um 3,5 milljarða króna á núvirði. Ráðgert er að kostnaður við byggingu nýs þjóðarleikvangs í knattspyrnu muni nema á bilinu 3,5 – 4,5 milljarða króna.

Áætlað er að heildarkostnaðurinn við uppbyggingu íþróttasvæðisins umhverfis Daugavas Stadions muni nema um 8,2 milljörðum króna og því er líklegt að Lettland muni eyða nálægt 13 milljörðum króna í uppbyggingu þjóðarleikvanga á næstu árum.

Hérlendis er lítil hreyfing í þessum málum þó öllum sé ljóst að þörf sé á að endurbæta Laugardalsvöll, byggja nýjan þjóðarleikvang fyrir frjálsar íþróttir og nýjan þjóðarleikvang fyrir innanhúsíþróttir.

Ég hef áður fjallað um þá ótrúlega uppbyggingu þjóðarleikvanga sem nú á sér stað í Lúxemborg en ef fram heldur sem horfir munu stjórnvöld í Lúxemborg hafa fjárfest fyrir um 26 milljarða króna í uppbyggingu þjóðarleikvanga árið 2023 þegar öllum framkvæmdum á að ljúka.

Samanlagt munu Lúxemborg og Lettland því eyða rúmum 40 milljörðum króna í uppbyggingu þjóðarleikvanga á komandi árum. Geri aðrir betur.