Sagan um íþróttahöllina sem þykir of vel heppnuð

Árið 2003 reis fjölnota íþróttahöll í Celje í Slóveníu sem enn í dag þykir eitt best heppnaða innanhúsíþróttamannvirki í Evrópu. Ástæðan er sú að byggingarkostnaður var lágur auk þess sem hönnun og skipulag byggingarinnar þykir framúrskarandi. Helsti kosturinn er þó sú gríðarlega stemning og sá mikli hávaði sem myndast í höllinni, gestaliðum til mikils ama. Margir hafa haft á orði að þessi íþróttahöll sé of vel heppnuð.

Íþróttahöllin ber nafnið Zlatorog Arena og þótti mörgum skrítið að höll með 5.500 sæti skildi rísa í Celje þar sem íbúafjöldinn er um 40 þúsund manns. Það væri líkt og að á höfuðborgarsvæðinu yrði byggð ný íþróttahöll með 25 – 30.000 sæti en nóg um það.

Lítill vandi hefur reynst að reka mannvirkið.

Hér að neðan eru þrjár ljósmyndir af Zlatorog Arena:

Strax eftir byggingu mannvirkisins fór hróður þess að berast um álfuna og svo fór að þegar borgaryfirvöld í Veszprém í Ungverjalandi ákváðu að reisa nýja fjölnota íþróttahöll skildi Zlatorog Arena höfð sem fyrirmynd.

Afraksturinn var gríðarlega vel heppnuð eftirlíking og var Veszprém Arena vígð í júlí 2008 og nam kostnaðurinn við byggingu hallarinnar um tveimur milljörðum íslenskra króna.

Höllin þjónustar öllum þörfum innanhúsíþrótta í Veszprém auk þess sem hún er heimavöllur handboltarisans MBK Veszprém og þykir fátt jafnast á við stemninguna sem myndast þar á stórleikjum í handbolta. Hún tekur 5.096 áhorfendur í sæti og fékk handboltasnillingurinn Aron Pálmarsson að kynnast stemningunni þar inni en hann lék með MBK Veszprém um nokkurra ára bil.

Hér fyrir neðan eru tvær ljósmyndir af Veszprém Arena:

Íbúafjöldinn í Veszprém er um 60 þúsund manns eða litlu fleiri en íbúafjöldinn í Celje.

Saga þessara gríðarlega vel heppnuðu mannvirkja er þó ekki öll sögð enn því borgaryfirvöld í Kielce í Póllandi horfa nú til þessarra tveggja íþróttahalla sem fyrirmyndir nýrrar fjölnota íþróttahallar sem ráðgert er að rísi í borginni.

Nýja íþróttahöllin mun leysa hina 12 ára gömlu Hala Legionów af hólmi en þarfagreiningu við byggingu hennar virðist hafa verið mjög ábótavant því komið hefur á daginn að hún annar ekki að þjónusta innanhúsíþróttir í Kielce sem skildi.

Auk þess er hún heimavöllur pólska stórliðsins Vive Tauron Kielce og þykja 4.200 sæti of fá þegar stórleikir í Meistaradeildinni eru spilaðir þar.

Borgaryfirvöld í Kielce hafa því ákveðið að leita í hönnun og skipulag Zlatorog Arena en með töluvert stækkuðu sniði. Hönnun er sú sama, bara stærri.

Íbúar í Kielce eru 200 þúsund talsins og því ljóst að ný íþróttahöll þarf að rúma fleiri en 5.000 áhorfendur.

,,Okkar hugmyndir eru að byggja íþróttahöll sem mun rúma 8.200 manns í sæti og við erum þess fullviss að hún verði troðfull á hverjum meistaradeildarleik,” sagði forseti Vive Tauron Kielce árið 2015.

Hér fyrir neðan eru þrjár tölvuteiknaðar myndir af Kielce Arena:

Gætum við Íslendingar leitað í þennan brunn? Byggt íþróttahöll sem yrði byggð með Zlatorog Arena sem fyrirmynd. Hún þyrfti þó að rúma fleiri áhorfendur en þá gætum við skoðað þær hugmyndir sem eru í gangi í Kielce.

Það væri ekkert slor að reisa mannvirki sem teldist of vel heppnað.