Laugardalshöllin: gömul, eldri, elst

Þegar fjórar síðustu undankeppnir í EM í handbolta eru skoðaðar kemur í ljós að Laugardalshöll er langelsta íþróttahöllin sem er notuð að staðaldri í keppnisleikjum í Evrópu.

Fjölnota íþróttahöll.

Alls fóru fram 12 landsleikir í í Laugardalshöll í undankeppni EM á þessu tímabili, eða allir heimaleikir Íslands.

Auk Laugardalshallarinnar fóru á þessu tímabili fram landsleikir í 12 öðrum íþróttahöllum sem reistar voru fyrir 1970. Engin þeirra hýsti jafnmarga leiki og Laugardalshöllin en þær hallir sem komust næst Laugardalshöllinni hýstu fjóra leiki á þessu tímabili, eða að meðaltali einn leik í hverri undankeppni.

Þær hallir sem hýstu fjóra landsleiki voru Yunost Sports Palace (1967) í Chelyabinsk í Rússlandi, Dvorana Mirza Delibasic (1969) í Sarajevo í Bosníu og Minsk Sports Palace (1966) í Minsk í Hvíta-Rússlandi.

Þessar þrjár íþróttahallir eru allar handan austantjaldsins en Ísland er eina Vestur-Evrópu þjóðin þar sem landsleikir í handknattleik eru leiknir að staðaldri í höll sem er eldri en 30 ára. Laugardalshöllin er yfir 50 ára gömul!!

Í þessum fjórum undankeppnum voru tveir leikir spilaðir í Hovet (1962) í Stokkhólmi, þrír leikir í Olympiahalle í Innsbruck (1963) í Austurríki, einn leikur í Sparkassen Arena (1951) í Kiel í Þýskalandi og einn leikur í ÖVB Arena (1964) í Bremen í Þýskalandi.

Við verðum þó að hafa í huga að í tilfellum þessarra fjögurra vestur-evrópsku íþróttahalla; Hovet, Olympiahalle, Sparkassen Arena og ÖVB Arena hefur orðið mikil enduruppbygging á ytra byrði og öllu innvolsi. Þær endurbætur sem þar hafa átt sér stað síðustu áratugi eru miklu meiri og ítarlegri en þær sem hafa átt sér stað á Laugardalshöllinni.

Laugardalshöllin er þó ekki elsta höllinn (enn) sem hýsti landsleiki í þessum fjórum undankeppnum en sjö íþróttahallir voru reistar fyrir daga Laugardalshallarinnar. Í flestum tilvikum var þó um að ræða einn stakan leik í höllunum yfir þetta tímabili en ekki 12 leiki líkt og var tilfellið í Laugardalshöll.

Elsta íþróttahöllin var Kauno Sporto Halé (1939) í Kaunas í Litháen.

Samanburður við Norðurlönd

Það tíðkast á Norðurlöndum, líkt og víða, að landsleikir gegn minni spámönum eru leiknir í minni íþróttahöllum og eru landsleikir Norðurlandaþjóðanna oft spilaðir í 2 – 3 iþróttahöllum í undankeppnunum. Mikilvægir landsleikir gegn stærri andstæðingum eru oftast spilaðir í stærstu höllunum.

Með því að bera saman meðalaldur þessarra íþróttahalla við aldur Laugardalshallarinnar, kemur í ljós að Finnar spila í langyngstu höllunum, þar sem meðalaldurinn er 8,7 ár. Svíar koma næst en þeir spila í höllum sem eru að meðaltali 17,75 ára. Íþróttahallir Dana sem notaðar voru á þessu tímabili voru að meðatali 24,5 ára og 25,4 ára hjá Norðmönnum. Íslendingar spiluðu að sjálfsögðu í 53 ára gamalli Laugardalshöll.

Eitt að lokum en 58% íþróttahallanna sem spilað var í í þessum fjórum undankeppnum voru reistar eftir árið 2000.

Þessu til viðbótar er hægt að rifja upp að Laugardalshöllin var ELST allra keppnishallanna í undankeppni HM í handbolta í síðasta mánuði.