Fara í aðalinnihald

Framtíðaríþróttasvæði Njarðvíkur verður við Afreksbraut

Við Afreksbraut í Njarðvík er kominn vísir að íþróttasvæði sem mun þjóna ungmennafélagi Njarðvíkur um ókomin ár. Þar hefur félagið byggt upp nýjan knattspyrnuvöll sunnan við Reykjaneshöllina og gera áætlanir ráð fyrir því að önnur starfsemi íþróttafélagsins flytjist þangað þegar fram líða stundir.

Nýtt íþróttahús félagsins mun því rísa á svæðinu og vangaveltur um að það verði byggt annarsstaðar eiga ekki við rök að styðjast.

Hér verður íþróttasvæði Njarðvíkur til framtíðar. Mynd: Ja.is.
Samkvæmt heimildum undirritaðs eru körfuknattleiksdeild og knattspyrnudeild félagsins mjög samstíga með að framtíðaraðstaða félagsins verði staðsett við Afreksbraut. Þar hefur knattspyrnan fengið athvarf og er von manna að aðstaða fyrir körfuknattleikinn rísi þar í náinni framtíð.

Ljónagryfjan, núverandi íþróttahús Njarðvíkur sem er staðsett við grunnskóla hverfisins hefur þjónað skólastarfi og hinum ýmsu íþróttagreinum í 45 ár en það er ljóst að reisa þarf stærra mannvirki undir innanhúsíþróttastarfsemi ungmennafélags Njarðvíkur.

Þar er körfuknattleikurinn vitaskuld fyrirferðarmestur en núverandi íþróttahús stenst ekki nútímakröfur og reglugerðir varðandi algild keppnishús í körfuknattleik.

Íþróttasvæðið við Afreksbraut
Íþróttastarfsemi í Njarðvík stendur á tímamótum. Vöntun hefur verið á alhliða íþróttasvæði í hverfinu sem samanstendur af þyrpingu íþróttamannvirkja á tiltölulega litlu svæði.

Knattspyrnuleikvangur Njarðvíkur var áður staðsettur við Vallarbraut í hálfs km fjarlægð frá Ljónagryfjunni. Með tilkomu nýs knattspyrnuvallar við Afreksbraut er fjarlægðin milli þessarra mannvirkja nú 1 km.

Til samanburðar þá er íþróttahús Keflavíkur staðsett á sama svæði og knattspyrnuvöllur félagsins en um 50 metrar aðskilja þessi tvö mannvirki.

Íþróttasvæðið við Afreksbraut er staðsett á vesturjaðri Njarðvíkurhverfisins í Reykjanesbæ og er nægjanlegt rými þar til að byggja upp stórt hágæða íþróttasvæði þar sem aðstaða verður fyrir knattspyrnu, innanhúsíþróttir og frjálsar íþróttir. Í því felst mikil hagræðing þar sem t.a.m. er hægt að samnýta þjónustu og bílastæði.

Tölvuteiknuð mynd frá 2006 sem sýnir hvernig íþróttasvæðið við Afreksbraut átti að líta út. Mynd: Arkitektur.is.
Gríðarleg íbúafjölgun hefur átt sér stað í Reykjanesbæ á undanförnum árum og er þörfin á rúmgóðu alhliða íþróttasvæði því orðin mikil. Mikil uppbygging á sér nú stað norðan við svæðið þar sem Hlíðarhverfið er tekið að rísa. Sunnan við svæðið er síðan ráðgert að stórt útivistarsvæði verði staðsett, svokölluð útivistarparadís.

Byggðin mun halda áfram að þróast og í framtíðinni mun íþróttasvæðið við Afreksbraut þróast úr jaðarsvæði yfir í íþróttasvæði innan byggðar með umliggjandi byggð.

Byggðaþróunin var t.a.m. á þann veg á Selfossi þar sem gisið jaðaríþróttasvæði er í dag orðið frábært alhliða íþróttasvæði innan byggðar. Framtíðarmöguleikar íþróttasvæðisins við Afreksbraut í Reykjanesbæ eru miklir. Þar eru gríðarlega miklir uppbyggingarmöguleikar auk frábærrar staðsetningar sem felur í sér að þetta gætið orðið eitt besta íþróttasvæði landsins.

Sjá einnig: Höllin er úrelt - nýja höll strax

Íþróttasvæðið á Selfossi var áður staðsett á jaðri byggðarinnar en er í dag inni í miðri byggð.

Ummæli

Skrifa ummæli

Vinsælar færslur af þessu bloggi

Kristianstad Arena í Svíþjóð

Svíar eru leiðandi afl í uppbyggingu íþróttamannvirkja á Norðurlöndum og í Kristianstad þar sem búa um 40.000 þúsund manns er að finna gríðarlega vandaða fjölnota íþróttahöll. Höllin sem um ræðir ber heitið Kristianstad Arena og var tekin í notkun árið 2010. Hún tekur 4.700 áhorfendur í sæti og var ein af keppnishöllunum á HM í handbolta í Svíþjóð 2011. Byggingarkostnaður hallarinnar nam um 4,5 milljörðum íslenskra króna á núvirði og var fjármögnunin alfarið í höndum sveitarfélagsins Kristianstad. Þó svo að höllin taki einungis 4.700 manns í sæti er hönnunin slík að svo virðist sem hún rúmi mun fleiri áhorfendur. Þetta er gríðarlega skemmtilegt og metnaðarfullt mannvirki sem 40.000 manna bær getur verið stoltur af. Þess má geta að höllin er heimavöllur IFK Kristianstad, þar sem Ólafur Andrés Guðmundsson, handknattleikskappi, hefur gert garðinn frægan á undanförnum árum.   Skjáskot: Google Earth. Mynd: Petter Arvidson/Bildbyrån.
Skrifa ummæli
Lesa meira

Árið var 1971 og þröngt setin Laugardalshöll var við það að springa

Handknattleikur er þjóðaríþrótt Íslendinga, á því leikur enginn vafi, og ríkti sannkallað handboltafár í Laugardalshöllinni árið 1971 þegar hluti Íslandsmótsins fór fram á fjölum hennar. Í frétt sem birtist í Morgunblaðinu í febrúar það ár segir frá því að höllin væri margsinnis troðfull af áhangendum sem flyktust þangað til að berja goðin augum. Svo segir um atganginn í Höllinni miðvikudagskvöldið 17. febrúar árið 1971 þegar tveir stórleikir á Íslandsmótinu fóru þar fram, annars vegar leikur ÍR og Víkings og hins vegar viðureign Vals og FH. ,, Alls keyptu rúmlega 3.300 manns sig inn á leikina og boðsgestir og aðrir munu hafa verið um 200, svo alls munu um 3.500 manns hafa fylgst með þessum spennandi leikjum ,“ stóð í fréttinni. ,, Vel kann að vera áhorfendur í Laugardalshöllinni þetta kvöld hafi verið nokkur hundruðum fleiri en gott rúm var fyrir og kvörtuðu nokkrir yfir því að þeir hefðu lítið séð. Hins vegar er það annað en gaman að þurfa að vísa áhugasömu fólki frá, og því ...
Skrifa ummæli
Lesa meira

Nýtt körfuboltahús Hauka, Ólafssalur

Körfuknattleikslið Hauka mun spila á nýjum heimavelli á komandi leiktíð Domino's deildar karla og kvenna. Um er að ræða sérhæft körfuknattleikshús sem mun nær eingöngu þjónusta körfuknattleiksdeild Hauka. Um er að ræða einstakt hús á íslenska vísu og verður fróðlegt að fylgjast með því hvort önnur félög fylgi í kjölfarið. Keppnissalurinn er sérhannaður fyrir körfubolta og stúkan mun rúma 1100 manns en samkvæmt fréttum geta allt að 2.000 manns komist fyrir með því að raða fólki þétt á svölunum. Engin hefðbundin leikklukka verður í húsinu heldur verður stöðu, tíma og stigaskori varpað upp á LED skjái í sitthvorum enda vallarins. Meðfylgjandi myndir voru teknar af Erni Eyjólfssyni, ljósmyndara Fréttablaðsins, og birtist í frétt blaðsins um íþróttamannvirkið síðastliðið vor. Þá var áhorfendaaðstaðan ekki komin til landsins en hún ætti að vera kominn upp fyrir upphaf körfuknattleikstímabilsins í haust. Mynd: Örn Eyjólfsson, Fréttablaðið. Mynd: Örn Eyjólfsson, F...
Skrifa ummæli
Lesa meira