Fara í aðalinnihald

Laugardalshöll: þar sem áhættumiklir keppnisleikir fara fram


Eins og áður hefur komið fram er Laugardalshöllin ólöglegur keppnisstaður i alþjóðlegum keppnisleikjum á vegum Handknattleikssambands Evrópu og Körfuknattleikssambands Evrópu (FIBA Europe).

Stenst ekki öryggiskröfur
Í öryggisreglugerð EHF er ljóst að Laugardalshöllin fellur undir skilgreiningu á keppnishöllum þar sem áhættumiklir keppnisleikir fara fram. Í 3.1.2. kafla reglugerðarinnar segir m.a. ,,Áhættumiklir keppnisleikir eru keppnisleikir sem fara fram þar sem öryggi fólks er stefnt í hættu vegna fyrirkomulags og legu rýmisins í keppnishöllinni og/eða vegna skorts á afmörkun á áhorfendasvæðum."

Laugardalshöllin er á undanþágum í alþjóðlegum keppnisleikjum á vegum HSÍ og KKÍ en óvíst er hversu lengi þær munu vara enda kröfur um háa öryggisstaðla í nútímakeppnishöllum mjög ríkar.

Árið 2014 kom upp sú staða í landsleik Íslands og Ísraels í handknattleik að keppnisgólfið var of nálægt annarri langhliðinni. Í frétt sem birtist í Fréttablaðinu eftir leik stóð m.a.: ,,Eftirlitsmaður evrópska handknattleikssambandsins hafði út á ýmislegt að setja, t.a.m. klukkuna í Höllinni sem hikstaði öðrum megin og þrengsli þeim megin sem heiðursstúkan er."

Áður hafði eftirlitsmaðurinn sett út á legu keppnisvallarins þar sem hann var of nálægt áhorfendapöllunum í stóru stúkunni. Því varð að grípa til þess ráðs að færa völlinn 80 cm til suðurs. Það var gert til að tryggja öryggi áhorfenda þannig að hægt væri að rýma bygginguna á skömmum tíma, kæmi eitthvað upp á.

Eins og sést á hægri uppdrættinum er mjög þröngt milli áhorfendastúkanna og keppnisgólfsins og ekki batnar ástandið þegar auglýsingaskilti eru milli vallarins og stúkanna.
Vegna smæðar rýmisins er lega keppnisgólfsins alltaf til ama en vegna þrengsla sitthvorum megin við það, er ógerlegt að hreyfa mikið við því nema með því að þrengja enn meir að annarri hliðinni. Við þetta skapast hættuástand m.a. með tilliti til skjótrar rýmingar á fólki.

Samkvæmt skilgreiningu í öryggisreglugerð FIBA eru þrjú stærstu áhorfendahólfin í stóru stúkunni norðanmegin í byggingunni of stór með tilliti til rýmingar hússins, þ.e.a.s. ef einsýnt þykir að rýming gæti tekið lengri tíma en eðlilegt þykir. Þannig staða gæti komið upp í Laugardalshöll.

Slysahætta keppnisfólks
Til viðbótar við þá hættu er varðar öryggi áhorfenda er einnig hætta er steðjar að keppnisfólki í Laugardalshöllinni.

Í byrjun árs 2015 fékk FH-ingurinn Ísak Rafnsson alvarlegt höfuðhögg í bikarúrslitakeppninni í Laugardalshöll og áttu sjúkraflutningamenn í erfiðleikum með að athafna sig í byggingunni.  Það tók heila eilífð að koma honum í sjúkrabíl því að sjúkraflutningamenn komust ekki með tækin sín út úr höllinni.

Tveimur árum síðar, í febrúar 2017, lá við stórslysi þegar Valsmaðurinn Ólafur Ægir Ólafsson skall með miklum þunga á óvörðum, steyptum stólpa fyrir aftan annað markið. Líkt og sést á hægri uppdrættinum fyrir ofan sést að ekki er langt frá endalínu að stólpunum. Eftir atvikið voru stólparnir bólstraðir til að koma í veg fyrir frekari slys.

Einar Örn Jónsson, íþróttafréttamaður á RÚV og fyrrum landsliðsmaður í handbolta, var vitni að atvikinu og lét hafa eftirfarandi eftir sér í kjölfarð: ,,Ef menntamálaráðherra er að horfa, sem ég veit að hann er að gera þar sem hann er uppi í stúkunni. Þá er þetta ein af ástæðunum að Laugardalshöll er kol, kolólögleg. Þessi keppnishöll sem við Íslendingar höfum reyndar átt í rúm 50 ár er einfaldlega úr sér gengin og til skammar. Akkúrat svona atvik eru ástæðan fyrir því að kröfur til keppnishalla eru orðnar miklu, miklu meiri en á miðri síðustu öld þegar þessi höll var byggð. Þetta hús er einfaldlega úrelt og hættulegt fyrir afreksíþróttafólk. Það er hart að segja það en það er einfaldlega staðan. Þessu húsi þarf að loka."



Ummæli

Skrifa ummæli

Vinsælar færslur af þessu bloggi

Ný þjóðarhöll Finna – verkefni upp á 50 milljarða króna

Mikil framkvæmdagleði ríkir nú á Norðurlöndum í uppbyggingu innanhúsíþróttamannvirkja og virðist ekkert lát vera þar á. Finnar hafa tekið ákvörðun um að byggja nýja þjóðarhöll sem á að leysa hið glæsilega mannvirki, Hartwall Arena, af hólmi. Hartwall Arena var tekin í notkun árið 1997 og hefur þjónað tveimur þjóðaríþróttum Finna, ís- og körfuknattleik, af myndugleik í hartnær tvo áratugi. Þrátt fyrir tilkomu nýrrar þjóðarhallar mun Hartwall Arena þó enn nýtast í einhverjum tilvikum Helsinki Garden Nýja þjóðarhöllin mun rísa á helsta íþróttasvæði Finnlands, á hinu svonefnda Ólympíusvæði í Helsinki. Byggingin mun standa við hliðina á Helsingin jäähalli sem var helsta inniíþróttahöll Finnlands, frá 1966 til 1997. Um er að ræða gríðarlega metnaðarfullt og kostnaðarsamt verkefni sem ber heitið Helsinki Garden en sjálft keppnis- og áhorfendarýmið verður niðurgrafið. Ofan á niðurgrafinni keppnishöllinni verður stór garður og torg umlukið 8 – 13 hæða háhýsum þar sem m...
Skrifa ummæli
Lesa meira

Kristianstad Arena í Svíþjóð

Svíar eru leiðandi afl í uppbyggingu íþróttamannvirkja á Norðurlöndum og í Kristianstad þar sem búa um 40.000 þúsund manns er að finna gríðarlega vandaða fjölnota íþróttahöll. Höllin sem um ræðir ber heitið Kristianstad Arena og var tekin í notkun árið 2010. Hún tekur 4.700 áhorfendur í sæti og var ein af keppnishöllunum á HM í handbolta í Svíþjóð 2011. Byggingarkostnaður hallarinnar nam um 4,5 milljörðum íslenskra króna á núvirði og var fjármögnunin alfarið í höndum sveitarfélagsins Kristianstad. Þó svo að höllin taki einungis 4.700 manns í sæti er hönnunin slík að svo virðist sem hún rúmi mun fleiri áhorfendur. Þetta er gríðarlega skemmtilegt og metnaðarfullt mannvirki sem 40.000 manna bær getur verið stoltur af. Þess má geta að höllin er heimavöllur IFK Kristianstad, þar sem Ólafur Andrés Guðmundsson, handknattleikskappi, hefur gert garðinn frægan á undanförnum árum.   Skjáskot: Google Earth. Mynd: Petter Arvidson/Bildbyrån.
Skrifa ummæli
Lesa meira

Árið var 1971 og þröngt setin Laugardalshöll var við það að springa

Handknattleikur er þjóðaríþrótt Íslendinga, á því leikur enginn vafi, og ríkti sannkallað handboltafár í Laugardalshöllinni árið 1971 þegar hluti Íslandsmótsins fór fram á fjölum hennar. Í frétt sem birtist í Morgunblaðinu í febrúar það ár segir frá því að höllin væri margsinnis troðfull af áhangendum sem flyktust þangað til að berja goðin augum. Svo segir um atganginn í Höllinni miðvikudagskvöldið 17. febrúar árið 1971 þegar tveir stórleikir á Íslandsmótinu fóru þar fram, annars vegar leikur ÍR og Víkings og hins vegar viðureign Vals og FH. ,, Alls keyptu rúmlega 3.300 manns sig inn á leikina og boðsgestir og aðrir munu hafa verið um 200, svo alls munu um 3.500 manns hafa fylgst með þessum spennandi leikjum ,“ stóð í fréttinni. ,, Vel kann að vera áhorfendur í Laugardalshöllinni þetta kvöld hafi verið nokkur hundruðum fleiri en gott rúm var fyrir og kvörtuðu nokkrir yfir því að þeir hefðu lítið séð. Hins vegar er það annað en gaman að þurfa að vísa áhugasömu fólki frá, og því ...
Skrifa ummæli
Lesa meira