Fara í aðalinnihald

Pistill: Stuðlar þessi tölfræði að framþróun hand- og körfuboltans á Íslandi?

Hver er rökhugsunin bak við þá staðreynd að síðan íslenska karlalandsliðið í handknattleik vann til silfurverðlauna á Ólympíuleikunum í Pekíng 2008 og til bronsverðlauna á Evrópumótinu í Austurríki árið 2010, hefur sætaframboð í Laugardalshöllinni minnkað um 500 sæti, úr 2.800 niður í 2.300. Það þýðir að 18% færri áhorfendur komast á keppnisleiki í dag en fyrir 10 árum.

Árið 1992 komust 3.400 áhorfendur fyrir á landsleikjum í höllinni sem þýðir að 32% færri áhorfendur komast á keppnisleiki í Laugardalshöll nú en fyrir 26 árum síðan. Á sama tíma hefur orðið um 25% íbúafjölgun á landinu. Galið.

Árið 1992 rúmaði Laugardalshöllinn um 1,3% íslensku þjóðarinnar en í dag rúmar hún einungis 0,6% þjóðarinnar.

Stuðlar þessi tölfræði að framþróun handboltans á Íslandi?

Nú, eða körfuboltans? Hvað ef Tryggvi Hlinason hefði komist í NBA-deildina í sumar eða á næsta ári eða því þar næsta? Hann yrði stór fyrirmynd fyrir þúsundir barna og unglinga. Og þegar gríðarlega mikilvægan landsleik bæri að garði í höllinni yrði því miður einungis hægt að selja 2.300 miða. Nei, kannski 1.500 miða því styrktaraðilar og áhangendur gestaliða þurfa sinn skerf. Hversu margir fengju ekki að berja goðið sitt augum? Er það körfuboltanum eða handboltanum hérlendis til framdráttar að einungis sé hægt að selja 1.500 miða til hins almenna stuðningsmanns á landsleiki? Ég spyr.

Laugardalshöllin tekur um 2.300 manns í sæti en frá árinu 1992 hefur landsmönnum fjölgað um 38 Laugardalshallir. Á sama tímabili hefur höfuðborgarbúum fjölgað um 22 Laugardalshallir. Á næstu 20 árum er því spáð að höfuðborgarbúum muni fjölga um því sem nemur 30 Laugardalshöllum. Landsmönnum mun fjölga um því sem nemur enn fleiri Laugardalshöllum.

Tímabilið 2007 – 2016 varð 25% iðkendafjölgun í handbolta og nam fölgunin 2.123 iðkendum eða nærri sætafjölda Laugardalshallar. HSÍ stefnir á að iðkendur verði yfir 10 þúsund árið 2019.

Frá 2007 – 2016 varð 19% iðkendafjölgun í körfubolta og voru iðkendur 7.142 árið 2016. Þess verður því ekki langt að bíða heldur þar til iðkendur í körfubolta verði fleiri en 10 þúsund. Væntanlega á fyrri hluta næsta áratugs.

Eins og áður sagði hefur sætaframboð í Laugardalshöll minnkað um 32% frá árinu 1992. Á sama tíma hefur sætaframboði í þjóðarhöllum flestra Evrópuþjóða fjölgað með tilkomu nýrra halla.

Sætaframboð hjá Dönum hefur t.a.m. aukist um 195%, 181% hjá Krótöum, 71% hjá Finnum, 218% hjá Búlgörum, 304% hjá Eistum, 356% hjá Hvít-Rússum, 123% hjá Slóvenum, 33% hjá Pólverjum og 10% hjá Bosníumönnum. Þetta er bara lítið úrtak en sýnir þróunina í Evrópu.

Það þarf auk þess ekkert að minnast frekar á aldur Laugardalshallarinnar sem er ein elsta íþróttahöll í Evrópu sem er notuð að staðaldri í keppnisleikjum í undankeppnum EM og HM í hand- og körfubolta.

Ummæli

Skrifa ummæli

Vinsælar færslur af þessu bloggi

Nýtt íþróttahús í Njarðvík?

Íþróttahúsið í Njarðvík, Ljónagryfjan svokallaða, er elsta keppnishúsið sem er í notkun í Domino‘s deild karla í körfuknattleik. Húsið var tekið í notkun árið 1973 og stendur við grunnskóla Njarðvíkur. Ef mið er tekið af íþróttahúsum sem byggð hafa verið hérlendis á síðasta áratug eða eru í byggingu er ljóst að mannvirkið er allt of lítið; ekki er nægilegt rými umhverfis keppnisgólfið og þá er takmörkuð aðstaða fyrir áhorfendur. Húsið er einfaldlega of lítið fyrir starfsemi félagsins. Vitaskuld er Ljónagryfjan fallegt og skemmtilegt íþróttahús og er það eitt af djásnum íslensks körfubolta en því miður er það ekki boðlegt lengur sem heimavöllur eins sigursælasta körfuknattleiksfélags landsins. ,,Ljónagryfjan" í Njarðvík. Skjáskot: Ja.is. Mikil íbúafjölgun Árið 1973 voru íbúar Njarðvíkur 1.700 en í dag búa yfir 6.000 manns í Njarðvíkurhluta Reykjanesbæjar. Fjölgun íbúa í Njarðvík nemur því um 250% á tímabilinu og er ljóst að þörf er á aðgerðum af hálfu bæjaryfirvalda sem ...
Skrifa ummæli
Lesa meira

Kristianstad Arena í Svíþjóð

Svíar eru leiðandi afl í uppbyggingu íþróttamannvirkja á Norðurlöndum og í Kristianstad þar sem búa um 40.000 þúsund manns er að finna gríðarlega vandaða fjölnota íþróttahöll. Höllin sem um ræðir ber heitið Kristianstad Arena og var tekin í notkun árið 2010. Hún tekur 4.700 áhorfendur í sæti og var ein af keppnishöllunum á HM í handbolta í Svíþjóð 2011. Byggingarkostnaður hallarinnar nam um 4,5 milljörðum íslenskra króna á núvirði og var fjármögnunin alfarið í höndum sveitarfélagsins Kristianstad. Þó svo að höllin taki einungis 4.700 manns í sæti er hönnunin slík að svo virðist sem hún rúmi mun fleiri áhorfendur. Þetta er gríðarlega skemmtilegt og metnaðarfullt mannvirki sem 40.000 manna bær getur verið stoltur af. Þess má geta að höllin er heimavöllur IFK Kristianstad, þar sem Ólafur Andrés Guðmundsson, handknattleikskappi, hefur gert garðinn frægan á undanförnum árum.   Skjáskot: Google Earth. Mynd: Petter Arvidson/Bildbyrån.
Skrifa ummæli
Lesa meira

Árið var 1971 og þröngt setin Laugardalshöll var við það að springa

Handknattleikur er þjóðaríþrótt Íslendinga, á því leikur enginn vafi, og ríkti sannkallað handboltafár í Laugardalshöllinni árið 1971 þegar hluti Íslandsmótsins fór fram á fjölum hennar. Í frétt sem birtist í Morgunblaðinu í febrúar það ár segir frá því að höllin væri margsinnis troðfull af áhangendum sem flyktust þangað til að berja goðin augum. Svo segir um atganginn í Höllinni miðvikudagskvöldið 17. febrúar árið 1971 þegar tveir stórleikir á Íslandsmótinu fóru þar fram, annars vegar leikur ÍR og Víkings og hins vegar viðureign Vals og FH. ,, Alls keyptu rúmlega 3.300 manns sig inn á leikina og boðsgestir og aðrir munu hafa verið um 200, svo alls munu um 3.500 manns hafa fylgst með þessum spennandi leikjum ,“ stóð í fréttinni. ,, Vel kann að vera áhorfendur í Laugardalshöllinni þetta kvöld hafi verið nokkur hundruðum fleiri en gott rúm var fyrir og kvörtuðu nokkrir yfir því að þeir hefðu lítið séð. Hins vegar er það annað en gaman að þurfa að vísa áhugasömu fólki frá, og því ...
Skrifa ummæli
Lesa meira